البوست الثانى :- ما بعد الاستقبال والتحضين - سلسة مربى الدواجن الناجح للمبتدئين

• 
• السلام عليكم ورحمة الله
  البوست الثانى من سلسة ازاى تكون مربى ناجح
  
  **** مابعد الاستقبال والتحضين ****
  
  اتكلمنا فى البوست الاول عن الاستقبال وكيفية التعامل مع كل كتكوت حسب حجمه واهميه نظافة المساقى واطباق التحضين وكيفية التحضين بمضاد حيوى .
  
  طيب اليوم هنتكلم عن ما بعد التحضين , خلاص انا خلصت الكورس بتاع المضاد الحيوى والامور تمام الحمد لله , ازاى ابدأء تهويه فى الفتره دى وديما بقول ان التهويه من اول ساعه مش من اول يوم؟ .
  خليك فاهم ان كل يوم بيعدى ف عمر الكتكوت يعنى زياده فى الحجم يعنى احتياج اقل من اليوم قبليه فى الحراه يعنى احتياج اعلى من اليوم الى قبليه فى التهويه , ديما خدها قعده هوى على اد ماتقدر بس بالشرط دا ** الا تتسبب التهويه فى حدوث تيار هواء على ظهر الكتكوت او سقوط درجة الحراره .
  
  طيب هوا مين الاهم فى المرحله بتاعت العمر الصغير التهويه ام الحراه ؟!!
  
  هنقول التهويه مهمه فى الفتره دى ولكن الحراره اهم ودا لان ثبات درجة الحراره بيساعد الكتكوت حديث الفقس فى التخلص من كيس المح وكمان نزول درجة الحراره عن المطلوبه بشكل متكرر بيؤدى الى عملية الترييش المبكر الى بالتالى بيكون الغذاء الى بيتناوله الطائر متجه اكتر للريش مش لتكوين الانسجه او الخلايا العضليه الى هتكون فيما بعد الهيكل الاساسى لتكوين طبقات اللحم , بالبلدى بخسر وزن الكتكوت .
  
  الخلاصه ابداء زود تهويتك مع ثبات درجة الحراره .
  
  ابداء شيل المساقى الاراضى لو عندك خطوط نبل بس حزارى انك تشيلها كلها مره وحده عشان ماتعملش صدمه للكتكوت الى متعود على المساقى وبالتالى يحصله جفاف يعنى شيل المساقى على مرتين او تلاته هيكون افضل , ابداء وسع فى حجم الحضان عشان الكتكوت ياخد راحته فى المساحه .
  
  طب هل فى حاجه غريبه ممكن الاحظها فى الفتره دى ؟ ايوه فى انك هتلاقى مؤخرة الكتكوت فيها اشره سوده نصيحه منى ليك ماتشغلش بالك بيها دى ناتجه عن الرطوبه او نقص الرطوبه
  
  طيب ايه الى استخدمه فى الميه يابشمهندس بعد فترة التحضين دى ؟ ممكن تستخدم منشطات مناعه ممكن تستخدم املاح معدنيه ممكن تستخدم مجموعة فيتامينات ممكن ميه بيضه فقط وانا بحبز دا اكتر فى اليوم الرابع والخامس .
  
  طيب هل احصن زيتى ميت ؟ ولا حى ؟ ولا احصن ايه ؟
  
  ببساطه كدا التحصين دا شيئ متغير وليس ثابت بمعنى ان كل منطقه ليها تحصيناتها وانا عشان مهندس مش طبيب بيطرى فبقلك توجه لاقرب عياده بيطريه ومعاك عينه من الكتاكيت يقيسوا تتر المناعه بتاعتهم ويعملولك برنامج تحصين يمشى مع المنطقه الى حضرتك بتربى فيها ولو بتربى فى اعداد بسيطه لا تتعدى الالف كتكوت بلاش تحصن خالص عشان ماتعملش كارثه للى حواليك فلا ضرر ولا ضرار .
  
  نقطه مهمه جداااا . اليوم السابع دا لازم ولابد تحقق وزن عالى على قد ماتقدر لان الوزن الاسبوعى الاول دا ان شاء الله هيكون مؤشر وزنك النهائى وكل ما كان متوسط وزن القطيع فوق ال 180 جرام كل ماكان نهاية الدوره بتعتك ميزانها كويس جداا
  
  اخر نقطه عشان ننتهى عند اليوم السابع من عمر القطيع لازم وحتما ولا بد انك تستخدم منشط مناعى قبل التحصين بيوم وبعد التحصين بيوم والافضل قبل التحصين ب 12 ساعه وبعد التحصين ب 12 ساعه .